2Ti 1 | GAM | STEP | Na Pol, God nomane pai mal pille une na dje wori, na Jisas Krais aposelye moro. God nono Krais Jisas boll gun molo pambon we dje wori pai ge, na po una dje awo moro.

2 Timothy 1

1 Na Pol, God nomane pai mal pille une na dje wori, na Jisas Krais aposelye moro. God nono Krais Jisas boll gun molo pambon we dje wori pai ge, na po una dje awo moro.

2 Timoti, ni na warna mal wopake moren ge na pepa bolo ni aundo. God nono Nane ne, nono Iwa Kerman Krais Jisas wandill golo awo, kumbene awo, ellne tukne arngan yenmell ge ni boll pandabe.

Nono ngandjill nagopon kandja mambine djimbon

3 Asa nena kambono God kogoye yei ge God nale al kogo pai mal yenmon dje kani. Alla na para kogo embe ye pagle, wopake we dje God aundo. Embe mal na imina armina ni we dje pille kamang ege ege ye aundo. 4 Ni nalen al kimb nuye yagi mal ge na pille moro, na ni kanno dje pille we yendo. Kanill dal, na nomana arngan kaima yenda. 5 Na kando, ni Jisas boll pillgi kaima paro. Asa ni auingama Lois ne, man Yunis pillgi djipill mal ni dje dongall yenden dje na embe kando. 6 Na ni nomanin to mago aundo. Asa na aglena pla woro ni abill al, God ni wal gorwulle ta awo wori in. Yei al ge, ni wamo dal pu djimbenka do kund yendaka kogo ge yemben. 7 Ge nono kand gopon dje God Murble nono nawi, man. Une awi ge, nono yembene pandaka, una boll kane wopake ye, nonekne yenmon mal kanpol tambon dje awi.

8 Embe pille, nono Iwa Kerman yene kandjiye dje aumben mal ni ngandjill nagopen, na kaye paro dje ngandjill golo napupen, man. Na Jisas kandjiyembe wopake dje awo imb kakdo mal, ni God yembe dongall al, nono imb aike kakboll. 9 God nono yau to i yem woro nanam wombana mor we djindo. Nono kogo wopake ta yepin pille une nono yau to i yem nawori, man. Yene nomane pai mal pille, une nono wandill golo i yem wori. Kamasa kupill makimb napai poke, Krais Jisas kogo yei al God nono wandill golo i yem wori mormon. 10 Ipon, nono i yem wori iwa Krais Jisas er pene woi ge, God wandill golo awi mal kane kune yenmon. Krais kandjiyembe wopake pai pille, una gor me ge une to pora dje keri, una er wo gun po moye kond i pene wori kanmon.

11 God na dje wori pill ge, na tisa molo, aposel molo, Krais kandjiyembe wopake dje pene woro una auno dje pille dje wori pill. 12 Me embe pai pille, na imb merke kakdo. Ba na ngandjill nagoro, man. Na pillgi djindo iwa ge na pille kane yell. Ge pille, na embe pro, une na kogo aglena al awi ge, une kantau wopake ye pa moyaka, are yene egeye pillau djinda.

13 Na ni kandja wopake dje awill ge ni pillpol tamben. Na kandja du dje, dje una awill mal ge, ni pillpol to molo una beke aumben. Kandja dje una aumben ge ni Krais Jisas boll pillgi dje, una kane wopake ye kandja dje aumben. 14 God Murble nono boll moro ge pak to aundaka, God kandjiyembe wopake i ni aglen al awo wori ge kantau wopake yemben.

15 Ni kanden, una porapora propins Esia moi ge na kere er pi. Iwa Pigelus ne, Ermogenes para na kere er pupill.

16 Na Iwa Kerman kamang ye aundo, Onesiporus, game wombaye boll wandill golo aunda. Kune merke, Onesiporus na ye wopake ye awi, wopake pill. Na kaye paro ge une ngandjill nagoi, man. 17 Une er Rom wo yembeke ye na kuro kane ino dje yei, ye molo are na kane i. 18 Une dumo Epesus ege merkeke molo na amblo pille dje awi pille, na kamang ye Iwa Kerman aundo. God kot kerman piya poke ge une wandill golo Onesiporus aunda.